सिलवालको ‘डोरम्याट’ माथि परिचर्चा

काठमाडौं । कवि तथा सञ्चारकर्मी छविरमण सिलवालको कविताकृति ‘डोरम्याट’माथि परिचर्चा कार्यक्रम सम्पन्न भएको छ । सुनकोसी वाङ्मय प्रतिष्ठानको आयोजनामा उत्पला क्याफे बौद्धमा परिचर्चा कार्यक्रम सम्पन्न भएको हो ।

वरिष्ठ कवि कृष्ण बाउसेले डोरम्याटलाई नेपाली जनताको बिम्बको रूपमा कविता बुनिएको बताए । उनले भने–‘कृतिमा सुन्दर पर्या कविताहरू पनि छन् । पर्यावरणीय दृष्टिचेतका कविता हुनु राम्रो हो ।’ उनले आगामी संस्करणमा कृतिको आवरण प्रतिकात्मक होस भन्ने पनि सुझाव दिए ।

कवि एवं सम्पादक विमल भौकाजीले डोरम्याट आयातित शब्द हो तर यसलाई नेपाली बोलीचाली र भाषा साहित्यले ग्रहण गरिसक्यो भन्दै यो वर्ष पढेका कविता कृति मध्ये डोरम्याट सरल, सुललित भाषा र बिम्बहरु प्रयोग गरी समसामयिकतालाई ध्यान दिएको कविता कृति भएको बताए ।

 

कवि आरएम डंगोलले कृतिमाथि चर्चा गर्दै सामान्यतया कथ्य एउटै भए पनि त्यसलाई कसरी प्रयोग गर्ने भन्ने कविको आफ्नै शैली रहेको बताए । डंगोलले भने ‘समकालिन नेपाली कविताको मूल भावमै लेखिएका कविताहरू भएको बताउँदै कथ्यको हिसाबले प्रचलित शैलीमै कविताहरू छन् ।’ उनले कविता लेखन प्रतिकृयात्मक नहुनु राम्रो भन्दै शीर्षक प्रतिकात्मक हुँदा कविता वलशाली हुने आसय व्यक्त गरे ।

कवि तथा साहित्यकार नवराज रिजालले पाठकीय टिप्पणी प्रस्तुत गर्दै ‘कविता जीवनसँग जोडिनु पर्दछ । गलत कुराहरुको सपना देखाइ जनताको भावनामा शोषण हुनेगरी गलत कृयाकलापप्रति कविको व्याङ्ग्य छ । कविताहरुले परिवर्तन र पहिचान प्रति खवरदारी गरेका छन् ।’ रिजालले ‘हरेक कविता जीवनसँग जोडिएको बताए ।’
कृतिकार एवं सभाध्यक्ष छविरमण सिलवालले लेखकीय मन्तव्य व्यक्त गर्दै समाजका अवयबहरूले कविता कोर्न आफूलाई प्रेरित गरेको बताए । विभिन्न घट्नाको प्रभावले कविता सिर्जना हुने बताउँदै समय सापेक्ष परिष्कृत र परिमार्जित गर्न आफु तत्पर भएको बताए ।

यसअघि कवि विष्णु थापा, विश्व सिग्देल र पूर्ण बहादुर श्रेष्ठले कवि सिलवालका कविताकृति डोरम्याटका कविताहरु बाचन गरेका थिए । होमशंकर बास्तोलाले स्वागत गरेको उक्त कार्यक्रममा केशव पराजुली, बोधराज पौडेल, लगायतले आफ्ना धारणा राखेका थिए । कार्यक्रमको सञ्चालन प्रतिष्ठानका महासचिव साहित्यकार प्रदीप सापकोटाले गरेका थिए । मिडिया पार्टनर इखवर नेट डटकम रहेको उक्त कार्यक्रम आफु विरुद्धको आफैंको सहकार्यमा भएको हो । डोरम्याट भुँडीपुराण प्रकाशनद्वारा प्रकाशित कृति हो ।