उतारचढाव झेल्दै शेयरबजार २ हजार बिन्दुमाथि

बीहिबार सर्वोच्च अदालतले एफपीओको प्रिमियमको आयमा कर लाग्ने र मर्जर तथा प्राप्तिको आयमा कर लाग्ने आदेश दिंदा बिहिबारको शेयर कारोबार बन्द भईसकेको थियो । सर्वोच्चको आदेशपछि नेप्सेमा सुचिकृत मध्ये ४१ कम्पनीहरुले १२ अर्ब ४७ करोड कर तिरे।

त्यसपछि आज आइतबार खुलेको बजारमा के होला भन्ने चासो थियो । कम्पनीहरुले ‘भूतकर’ भन्ने गरेको यो करको विषयले आज आइतबारको बजारलाई चासोका साथ हेरिएको थियो । आज प्रि ओपन सेसनमा नेप्से सूचक घटेको थियो नियमित समयमा पनि बजार ५ मिनेटसम्म तिब्र गिरावट आएर ३५ अंकसम्म घटेको थियो ।

बैंक वित्तीय संस्थाहरुले अदालतको आदेशपछि तिरेको करलाई ‘रिजर्भ’ बाट मिलान गर्न पाउने प्रस्ताव पठाउने समाचार बाहिरी आएपछि बजार बढ्न थाल्यो। रिजर्भबाट हिसाब मिलान गर्न पाउने व्यवस्था हुँदा यो बर्षको नाफामा असर नपर्ने भएकाले बैंकहरुले त्यसको लागि प्रस्ताव गर्ने समाचारहरु बाहिर आएका थिए। त्यसपछि भने नेप्से सूचक बढ्न थाल्यो । तिब्र उतारचढाव देखिएपछि अन्त्यमा बजार बढेर नै बन्द भएको छ। यस संगै लगानीकर्ताहरुले बजारले भूतकर पचाएको प्रतिक्रिया दिन थालेका छन्।

कारोबार अन्त्य हुँदा आज नेप्से सूचक २७.७५ अंकले बढेर २०२२.७५ को बिन्दुमा पुगेको छ । आज कारोबारमा आएका २९५ कम्पनीका १ अर्ब ७१ लाख ६६ हजार ४६५ कित्ता शेयर खरिद बिक्रीबाट ५ अर्ब १५ करोड ७८ लाख ४६ हजार ९ सय ७९ रुपैयाँ ५ पैसाको शेयर कारोबार भएको छ । जस मध्ये हिमाल दोलखा हाइड्रोको सर्वाधिक २५ करोड १२ लाख रुपैयाँको शेयर किनबेच भएको छ ।

त्यस्तै, सोनापुर मिनरल्सको १६ करोड ६५ लाख रुपैयाँ माथि, रिलायबल नेपाल लाइफ इन्स्योरेन्सको १६ करोड १५ लाख, शिवम सिमेन्टको १४ करोड ५ लाख तथा अरुण काबेली हाइड्रोको १२ करोड ९५ लाखको कारोबार भएको छ ।

आज ११ कम्पनीको शेयर मुल्यमा सकारात्मक सर्किट लागेको छ । सकारात्मक सर्किट लागेका ११ कम्पनीमा बोटलर्स नेपाल बालाजु, रिडी पावर, शिवश्री हाइड्रो, बलेफी हाइड्रो, दोर्दी खोला हाइड्रो, विन्ध्वासिनी हाइड्रो, सगरमाथा जलविद्युत, भुगोल इनर्जी, रावा इनर्जी, थ्रीस्टार हाइड्रो र हाथवे इन्भेष्टमेन्ट रहेका छन् ।

त्यस्तै, युनियन हाइड्रोपावर, मुक्तिनाथ कृषि कम्पनी, पिपुल्स हाइड्रो, मकर जितुमया हाइडो, मैलुङ्ग खोला हाइड्रो, न्यादी हाइड्रो, घलेम्दी हाइड्रो, आँखुखोला हाइड्रो, मेन्छ्यिम हाइड्रो, हिमाल दोलखा हाइड्रो लगायतका कम्पनीको शेयर ९ प्रतिशत बढीले बढेको छ ।