पाँच खर्ब चार अर्ब ११ करोडबराबरको भारु खरिद
काठमाडौं,नेपाल राष्ट्र बैंकले चालू आर्थिक वर्षको पछिल्लो १० महिनाको अवधिमा ४९ खर्ब रुपैयाँभन्दा बढी तरलता प्रवाह गरिएको जानकारी दिएको छ । राष्ट्र बैंकका अनुसार यही वैशाख मसान्तसम्ममा रिपोमार्फत चार खर्ब १४ अर्ब ४७ करोड, सोझै खरिद बोलकबोलमार्फत ८९ अर्ब ७० करोड, स्थायी तरलता सुविधामार्फत २७ खर्ब २६ अर्ब ९६ करोड र ओभरनाइट तरलता सुविधा १७ खर्ब १८ अर्ब आठ करोड रुपैयाँ समेत गरी कुल ४९ खर्ब ४९ अर्ब २२ करोड (कारोबारमा आधारित) तरलता प्रवाह गरिएको हो ।
यस अवधिमा रिभर्स रिपोमार्फत भने पाँच अर्ब रुपैयाँ तरलता प्रशोचन गरिएको छ । राष्ट्र बैंकका अनुसार अघिल्लो वर्षको सोही अवधिमा भने विभिन्न किसिमका मौद्रिक उपकरणहरूमार्फत खुद ७३ खर्ब ४२ अर्ब ६५ करोड तरलता प्रवाह गरिएको थियो । चालू आवको पछिल्लो १० महिनामा राष्ट्र बैंकले विदेशी विनिमय बजार अर्थात् वाणिज्य बैंकहरूबाट अमेरिकी डलर चार अर्ब ७४ करोड खुद खरिद गरी छ खर्ब १९ अर्ब ७६ करोड तरलता प्रवाह गरेको छ । अघिल्लो वर्षको सोही अवधिमा विदेशी विनिमय बजारबाट अमेरिकी डलर दुई अर्ब १२ करोड खुद खरिद गरी दुई खर्ब ५६ अर्ब ७३ करोड तरलता प्रवाह गरिएको थियो ।
राष्ट्र बैंकका अनुसार चालू आवको पछिल्लो १० महिनाको अवधिमा अमेरिकी डलर तीन अर्ब ८६ करोड बिक्री गरी पाँच खर्ब चार अर्ब ११ करोडबराबरको भारतीय रुपैयाँ खरिद भएको छ । अघिल्लो वर्षको सोही अवधिमा अमेरिकी डलर तीन अर्ब ९६ करोड बिक्री गरी चार खर्ब ७५ अर्ब ६८ करोडबराबरको भारतीय रुपैयाँ खरिद भएको राष्ट्र बैंकको भनाइ छ ।




फेसबुकबाट तपाईको प्रतिक्रिया