काठमाडौं । प्रतिनिधिसभाको पहिलो अधिवेशन एउटा पनि विद्येयक पारित नगरी अन्त्य भएको छ । गत पुस २५ देखि वैशाख १६ गतेसम्म सञ्चालन भएको बैठकले एउटा पनि विद्येयक पारित नगरी बैठक अन्त्य भएको हो । बैठक हिजो राती १२ बजेवाट अन्त्य भएको हो ।

संघीय संसद सचिवालयले सार्वजनिक गरेको प्रगति विवरण अनुसार संसद बैठकमा पेश भएका केही विद्येयकलाई सबन्धित समितिमा पठाईएको तथा राष्ट्रियसभावाट उत्पत्ति भई आएका बिद्येयकहरु माथि दफावार छलफल भने सम्पन्न भएका छन् । तर, झन्डै ४ महिनासम्म चलेको संसदले कुनै पनि विद्येयक भने पारित गर्न सकेन् ।

‘यस अवधिमा प्रतिनिधि सभामा उत्पत्ति भएको “सम्पत्ति सुद्धिकरण (मनि लाउण्डरिङ) निवारण तथा व्यावसायीक वातावरण प्रवद्र्धन सम्बन्धी केही ऐनलाई संशोधन गर्ने विधेयक, २०७९”, “संवैधानिक परिषद् (काम, कर्तव्य, अधिकार र कार्यविधि) सम्बन्धी (पहिलो संशोधन) विधेयक, २०७९” र “वेपत्ता पारिएका व्यक्तिको छानविन, सत्य निरुपण तथा मेलमिलाप आयोग (तेस्रो संशोधन) विधेयक, २०७९” लाई दफावार छलफलको लागि सम्बन्धित समितिमा पठाउने कार्य भएको छ,’ विद्येयक सबन्धी पहिलो अधिवेसनले गरेको काम कारबाहीका बारेमा भनिएको छ ।

यसैगरी, राष्ट्रियसभावाट उत्पति भएर आएका बिद्येयक माथिको दफाबार छलफल भने पहिलो अधिवेसनमा सम्पन्न भएको छ । ‘राष्ट्रिय सभामा उत्पत्ति भई प्रतिनिधि सभामा प्राप्त अनुगमन तथा मुल्यांकन विधेयक, अभिलेख संरक्षण (पहिलो संशोधन) विधेयक, खाद्य स्वच्छता तथा गुणस्तर विधेयक, सार्वजनिक सेवा प्रशारण विधेयक, सुरक्षण मुद्रण सम्बन्धी विधेयक, अख्तियार दुरुपयोग अनुसन्धान आयोग (तेस्रो संशोधन) विधेयक लाई दफावार छलफलको लागि सम्बन्धित समितिमा पठाउने कार्य भएको छ भने भ्रष्टाचार निवारण (पहिलो संशोधन) विधेयक माथि सभामा सैद्धान्तिक छलफल भइसकेको अवस्था छ,’ पहिलो अधिवेसनमा भएको काम कारबाहीको विवरण सार्वजनिक गर्दै सचिवालयले भनेको छ ।