सुपारीको पाँच करोड राजश्व छल्न अर्थमन्त्री र प्रधानमन्त्रीको लविङ

सुपारी कारोबारी दीपक पोखरेलको समूहले आयात गरेको १९८ टन सुपारी विराटनगर भन्सारले नछाडेपछि आयातकर्ताको समूह नयाँ सरकारको पर्खाईमा छ।

यसअघि भन्सार विभागदेखि बालुवाटारसम्म धाउँदा पनि सुपारी नछुटेपछि आयातकर्ताको समूह नयाँ सरकारको पर्खाइमा बसेको हो। विराटनगर भन्सार कार्यालयका अनुसार इन्डोनेसियाबाट आयात गरिएको सो १९८ टन सुपारी विराटनगरका व्यापारी सञ्जय अग्रवालले आयात गरेका हुन्। व्यवसायी अग्रवालले आफ्नो व्यापारिक फर्म नेशनल मोटर्सका नाममा ल्याएका थिए।

अर्थमन्त्री जनार्दन शर्माले गत जेठ १५ गते प्रस्तुत गरेको बजेटमा सुपारीको आयात शुल्क बढाउँदै भन्सार महसुल प्रति किलो ४५ रुपैयाँबाट १ सय र अन्तःशुल्क प्रति किलो २५ रुपैयाँबाट १ सय नै बनाएका छन्। यसरी एक किलो सुपारी आयात गर्दा २०७९ जेठ जेठ १४ सम्म भन्सार ४५ र अन्तःशुल्क २५ गरेर ७० रुपैयाँ तिर्नुपर्थ्यो।

सो आयातशुल्क जेठ १५ पछि भन्सार महसुल १ सय र अन्तःशुल्क १ सय गरी २ सय भएको छ। तर आयातकर्ताले भन्सार कार्यालयमा सुपारीको जाँचपासमा आयातशुल्क प्रति किलो २ सय  तिरेर मात्र पुग्दैन। भन्सार कार्यालयले उक्त २ सय रुपैयाँमा सुपारी आयात गर्दाको ढुवानी खर्च र तिरिएको बिमाको रकम पनि जोड्छ। यसरी भन्सार महसुल, अन्तःशुल्क, ढुवानी खर्च र बिमाको रकम जोडेर हुन आउने कुल योगफलमा मूअकर थपेर मात्र आयातशुल्क कायम गरिन्छ।

उक्त हिसाब बमोजिम नेशनल मोटर्सले १९८ टन सुपारीको ४ करोड ८३ लाख ९० हजार ११३ रुपैयाँ राजस्व तिर्ने घोषणा गरेको छ। तर उक्त राजस्व तिरेर मालको जाँचपास गराउन सकेको छैन।