आज सेयर बजारको यात्रा ओरालो, उकालो अनि ओरालो यात्रामा स्थिर रहन गयो। ११ बजे नियमित कारोबार खुल्ने वित्तिकै ओरालो लागेको नेप्से २० मिनेट पश्चात माथि उक्लन खोजे पनि ११:३० पछि पुन ओरालो लाग्यो । तत् पश्चात उकालो लाग्न खोजे पनि थप उचाई लिन सकेन । अन्तिम कारोवार समयमा नेप्सेले आजको न्यून विन्दु १ हजार ९ सय १८।८४ लाई छोए पश्चात १ हजार ९ सय २२।१६ विन्दुमा सामान्य उक्लेर बजार बन्द भयो । यो हिजोको तुलनामा १६।१४ अंकले (०।८३ प्रतिशत) नेप्से घटेको हो । नेप्सेले चार दिनको उकालो यात्रा गरेपछि आज नेप्से घटेको हो । तलको चित्र हेर्नु होस ।

आज भोलुम (Volume) वृद्दि नहुनु दुखद् रहेको छ । कारोवार रकमले १ अर्व नाघ्न सकेन । कुल ८९ करोड बराबरको कारोबार भएको छ । जस अनुसार हिजोको तुलनामा ३९ प्रतिशतले कोरोवार घटेको हो ।

आजको कारोबारलाई  ८ वटा आधी घण्टामा बिभाजन गर्दा अन्तिम आधी घण्टामा कुल कारोवारको २३ प्रतिशत कारोबार भएको छ । कारोबार समयलाई बराबर दुई दुई घण्टामा बिभाजन गर्दा पछिल्लो दुई घण्टाको कारोबार अघिल्लो दुई घण्टाको भन्दा २६ प्रतिशतले बढी रहेको छ । यस अर्थमा आजको कारोबार चापले नेप्से घट्नलाई मद्दत गरेको छ । तलको चित्र हेर्नु होस ।

Figure 1 आठ वटा क्रमागत आधी घण्टाको कारोबार भोलुम

Figure 2: दुई वटा क्रमागत दुई घण्टाको कारोबार भोलुम

आज २७ वटा कम्पनीको सेयर मुल्य बढेको छ भने १ सय ५३ वटा कम्पनीको सेयर मुल्य घटेको छ । ५ वटा कम्पनीको सेयर मुल्यमा कुनै फेरबदल भएन ।

आज मूल्य बृद्दि भएका १० उत्कृष्ट कम्पनीहरु निम्नानुसार रहेको छ । जसमा, ३ वटा लघुवित्त, ३ वटा वीमा, २ वटा हाईड्रोपावर र  एक एक वटा उत्पादन र लगानी कम्पनी रहेका छन । उत्कृष्ट १० कम्पनीहरुको अन्तिम सेयर मूल्य बृद्धि १ देखि ६ प्रतिशत भित्र सिमित रहेको छ । तसर्थ मूल्य बृद्दि भएका सेयरहरको मूल्य खासै बृद्दि भएको छैन ।

आज सबभन्दा बढी मूल्य घटेका १० कम्पनीहरु निम्नानुसार रहेको छ । जसमा ३ वटा हाईड्रोपावर, ३ वटा लघुवित्त, २ वटा फाईनान्स  एक एक वटा लगानी र ट्रेडिंग कम्पनी रहेका छन् । यी १० वटा कम्पनीको मूल्य घट्ने दर ३।४० प्रतिशत देखि ४।९४ प्रतिशतमा सिमित रहेको छ । जस अनुरुप कुनै पनि कम्पनीको मूल्य चर्कोसँग घटेको छैन ।

सेक्टर (sector wise) सूचकमा लाईफ ईन्सुरेन्स समूहको सूचक सबभन्दा बढी तर नगन्य मात्रामा बृद्दि भयाे ।  हाईड्रोपावर समूहको सूचक १ दशमलब ३७ प्रतिशतले सबभन्दा धेरै घटेको छ ।

आज सबभन्दा बढी कारोवार एभरेष्ट बैंकको भयो । यसको कारोबार करिब रुपैयाँ ४ करोड बराबरको भएको छ । दोस्रो स्थान चाहिँ ग्रामीण विकास बैंककाे रहेको छ । हिजो पहिलो स्थानमा रहेको शिवम सिमेन्ट आज पाँचौँ स्थानमा रहेको छ । सबभन्दा बढी कित्ता सेयरको लेनदेन चाहिँ ग्रामीण विकास बैक संस्थापक समूह (GBBLPO) को भएको छ । GBBLPO को एक लाख ७४ हजार कित्ता सेयर खरिद बिक्री भएको छ।

आज सेयर बजारलाई प्राविधिक सूचकबाट हेर्दा, बोलिंगर ब्यान्ड (Bollinger Band) फुक्न रोकिएको छ भने आज घटेको नेप्सेकोअन्तिम विन्दु बोलिंगर ब्यान्डभित्र आएर बसेको छ । जस अनुसार नेप्सेले बोलिंगर ब्यान्ड (Bollinger Band) को मान्यतालाई पछाएको देखिन्छ । बोलिंगर ब्यान्डको मान्यता, माथिल्लो वा तल्लो रेखा छोडेर बाहिर गएको अंक फेरि ब्यान्डभित्र नै आउनु पर्छ भन्ने रहेको छ । तलको चित्र हेर्नुहोस ।

पिभोट फिबोनाची (Pivot Fibonacci) अनुरुप नेप्सेले तेस्रो अबरोधक (resistance, R3)१ हजार ९ सय ५० लाई छुन सकेन । साथै दोस्रो अबरोधक (resistance, R2) सम्म आए पनि यो भन्दा मुनि  गएन । जस अनुरुप अर्को हप्ता नेप्सेले पुनतेस्रो अबरोधक (resistance, R3) परीक्षण गर्न जान सक्छ वा तल झरेर पिभोट तहमा आड (support) लिने प्रयास गर्न सक्छ । आज बनेको क्यान्डले नेप्से पिभोट तहमा परीक्षण गर्न जाने सम्भावना धेरै देखाएको छ ।  तलको चित्र हेर्नु होस ।

बजार घट्दा  भोलुम घटनु सकारात्मक नै मानिन्छ । चार दिनमा ९४ अंकले नेप्से बढेपछि १६ अंकले केही मात्रामा घट्नु स्वभाविक नै हो । आगामी हप्ता पुन सकारात्मक भोलुम नआएमा बजार बढ्ने सम्भावना फेरि कम नै हुन्छ । जस अनुरुप पुन नेप्से १ हजार ८ सय ७० को पिभोट विन्दु वरिपरि रुमलिरहने सम्भावना प्रवल हुन्छ । नेपालमा सेयर बजारको भोलुम बाह्य कारणहरु जस्तै तरलता, ब्याजदर, बैंकको ऋण प्रबाह आदिमा निर्भर हुने गरेको छ।

(तथ्यांक स्रोतः www.nepalstock.com.np

यहां उल्लेखित बिश्लेषण बिचारात्मक उदेश्यको लागी मात्र हो । कुनै कारोवारको लागी सल्लाह वा सिफारिस होईन ।)