भोलि नेप्सेले अर्थ मन्त्रीको अग्नी परीक्षा लिने
सेयर बजारले नयाँ अर्थ मन्त्रीप्रति दरो भरोसा प्रदर्शन गरेको छ । यो उत्साहलाई नयाँ सरकारले कायम राख्ने कामना गरौं । हामीले सर्वसाधारण लगानीकर्तालाई शुतुर्मुर्गा नबनौँ । आफ्नो गच्छे अनुसार कारोबारमा जोखिम लिन प्रेरित गरिरहेका थियौ । त्यस बेला जोखिम लिएका लगानीकर्ताहरुलाई आजको दिन निकै नै सुखद भएको हुनुपर्छ । सेयर बजारको सुन्दर पक्ष भनेको नै जोखिम र प्रतिफल हो । जुन अरु बैधानिक बजार वा ब्यबसायमा छैन । त्यसैले “रिस्क हे तो ईश्क हे” भन्ने डायलग सेयर बजार लगानीकर्ता माझ लोकप्रिय रहेको छ ।
नेपालको सेयर बजार ओरालो लाग्नु र भोलुम घटनुसंग तरलता वा बैंकको ब्याजसँग सम्बन्ध नरहेको हिजो र आजको कारोबारले देखाएको छ । किनभने अहिले न तरलता बढेको वा बैंकको ब्याज दर घटेको अबस्था हो । यी दुबै भविष्यमा हुन सक्ने अनुमान मात्र हो । तसर्थ नेपालको सेयर बजारको भोलुम आम लगानीकर्ताहरुको भावना र मनोविज्ञानसँग सम्बन्ध रहेको भन्न सक्छौ ।
आजशुरुवाती समयमै उकालो लागेको नेप्से केहि समय सामान्य ओरालो लागेपनि तत् पश्चात निरन्तर उकालो यात्रा गरिनै रहयो । अन्तिम आधीघण्टामा पुन ओरालो हिडने संशय गरेता पनि अन्तिम १० मिनेटमा नेप्से रेखा माथीतिरै तेर्सिएर आजको बजार बन्द भयो । आज नेप्सेको उच्चतम विन्दु १९९९।०१ कायम भयो र अन्तिम विन्दु १९८३।९५ रहयो । नेप्सेले २००० को तह काटन खोजे पनि आज यो सम्भव भएन ।

६ महिना पछि आज चार अर्बको हाराहारीमा भोलुम आएको छ । हिजोको तुलनामा करिब डोब्बरले भोलुम बढेको छ । कुल कारोबार समयलाई १० मिनेटमा बिभाजन गर्दा करिब साढे दुई बजे पश्चात आएको भोलुमले नेप्सेलाई २००० कटन रोकेको छ । आज अन्तिम १० मिनेटमा आउने गरेको तुलनात्मक धेरै भोलुम आएको छैन । बरु यस अगाडिको १० मिनेट भित्रको भोलुमले नेप्सेलाई २००० कटन रोकेको छ । तर अन्तिम १० मिनेटको भोलुमले थप तल झर्न चाहि रोकेको छ । यसलाई हामी २००० कटन नदिने कुनै समूह सक्रिय रहेको अनुमान गर्न सक्छौ । तर २००० को विन्दुमा trader psychology हावी भई सेयर बेच्न उद्दत भएको पनि हुन सक्छ ।

Figure 1 प्रत्येक १० मिनेटमाभएको कारोबार भोलुम र क्यान्डल बनावट
आज सेयर बजारलाई प्राबिधिक सूचकहरूवाट हेर्दा, बोलिंजर ब्यान्ड (Bollinger Band)को माथिल्लो र तल्लो रेखा फुक्ने संकेत गरेको छ भने मध्ये रेखा स्थीर रहेको छ । आज नेप्से, ब्यान्ड बाहिर गएर पुन ब्यान्ड भित्र नै बसेको छ । जुन सकारात्मक रहेको छ । तर भोली नेप्सेले पुन माथिल्लो रेखाको अबरोधक सामना गर्दैछ । यो अबरोधकलाई छिचोलेर माथी जान्छ कि जादैन? यसलाई अर्थ मन्त्रीसँगको अग्नी परीक्षाकोरुपमा लिन सकिन्छ ।

पिभोट फिबोनाची (Pivot Fibonacci) अनुरुप आजनेप्सेलेपिभोट रेखा (p)र पहिलो अवरोधक (Resistance, R1) दुवै पार गरेको छ । भोलि दोस्रो अवरोधक (Resistance, R2)पार गर्ने चुनौती रहेको छ ।

प्राविधिकरुपमा नेप्सेको लागी भोलि उकालो लाग्न ठूलो चुनौती रहेको छ । नेप्सेले भोलि २००० को तह पार गरेमा विभिन्न प्राविधिक औजारहरुको मान्यता अनुरुप पनि ब्रेक आउट भएको मान्न सक्छौ । यो ब्रेक आउट सफल भएमा नेप्से २२०० को तहसम्म जाने सम्भावना प्रबल हुनेछ ।
सेयर बजारको लगानीकर्तालाई दुई वर्गमा विभाजन गर्न सक्छौ । एक ठूला लगानीकर्ता जससँग ठूलो पुँजी, स्रोत साधन र महत्वपूर्ण सूचनाको पहुँच रहेको छ । त्यस्तै ठूलो संख्यामा रहेका आम लगानीकर्ता, जससंग सीमित पुँजी र स्रोत साधनको अभाव रहेको छ । यी दुई वर्गका लगानीकर्ताको अभावमा सेयर बजार चलन सक्दैन । तर ठूला लगानीकर्ताको चंगूलबाट बच्नआम लगानीकर्ता सजग हुनु जरुरी छ ।
सेयर बजारमा अहिले बिष्णु पौडेल सिन्ड्रोम छताछुल्ल भएको छ । अर्को अर्थमा भन्दा लगानीकर्ताहरुमा उन्मातको संकेत देखिएको छ । लगानीकर्ता सकारात्मक हुनु र बजार उन्मातिनु फरक फरक कुरा हुन । वारन बफेटको मान्यता अनुसार लगानीकर्ता, बजार मात्तिएको बेला डराउनु पर्छ, तर बजार डराएको बेला लोभीनु पर्छ भन्ने रहेको छ । यसको मतलब सर्वसाधारण लगानीकर्ताहरु निष्क्रिय बस्दा राम्रो भन्ने होईन । गच्छे अनुसार जोखिम ब्यबस्थापन गर्दै कारोबारमा स्मार्टपूर्वक सक्रिय सहभागी हुनु बढेको बजारलाई दिगो बनाउनु हो ।
भोलिलाई नेप्से लगायत नयाँ अर्थ मन्त्रीको अग्नी परीक्षाको रुपमा लिन सक्छौ । बजारले भोलि तय गर्नेछ, बजार बढाईएको हो वा साँच्चिकै अर्थ मन्त्रीप्रति आम लगानीकर्ताले भरोसा प्रकट गरेको हो ।
(तथ्यांक स्रोतः www.nepalstock.com.np तथा www.nepsealpha.com।




फेसबुकबाट तपाईको प्रतिक्रिया