नियामक निकायकाे चंगुलमा नेप्से

'तँ रोए जस्तो गर म कुटे जस्तो गर्छु'काे खेल

सेयर बजारमा आज पुन नियामक निकायको रमिता देखायाे । केही समय पहिले रिडी हाईड्रोपावरले कारोवार समयभित्र लाभांश घोषणा गर्यो र नियामक निकायले कारोबार स्थगित गरिदियो । रिडी हाईड्रोपावरलाई स्पष्टिकरण सोधे पश्चात पुन कारोबार खुल्ला भयो । हिजाे बुधवार फेरि सेन्ट्रल फाईनान्सले कारोवार समयभित्र लाभांश घोषणा गर्यो र नियामक निकायले कारोबार स्थगित गरिदियो । सेन्ट्रल फाईनान्सलाई स्पष्टिकरण सोधिएको छ ।

कुरा उही तर ‘दालमे कुछ काल हे’ भन्ने संकेत । रिडीको लाभांश घोषणा हुने दिन भन्दा तीन चार दिन अगाडिदेखि यसको सेयर मूल्य अस्वभाविक ढंगले बढ्न थालेको थियो । रिडीको लाभांश आकर्षक भएको हुँदा यसको मूल्य अझै आक्रामक ढंगले बढन सक्दथ्यो । कारोबार स्थगित भए पछि यसो हुन पाएन । सेन्ट्रल फाईनान्सको हकमा लाभांश आकर्षक छैन । यसको सेयर मूल्य केही दिन अगाडि देखिनै घटन थालेको थियो । जसरी मन्जुश्री फाईनान्सले लाभांश नदिने घोषणासँगै यसको सेयर मूल्य अस्वभाविक ढंगले घटेको थियो,  सेन्ट्रल फाईनान्सको पनि यहि नियति हुने सम्भावना प्रबल थियो ।

कारोबार स्थगित भए पछि यसो हुन पाएन । झट्ट हेर्दा ठिकै पनि हो । रिडीको अस्वभाविक ढंगले बढन पाएन भने सेन्ट्रल फाईनान्सको घटन पाएन । तर मूल विषय अबैध भित्री सूचनाको छाडा चलखेलमा नियामक निकायको अस्वभाविक खेल  उदेक लाग्दो रहेको छ । बजारलाई प्राकृतिक लय तर्फ लान नियामक निकाय किन उदाशीन ? भित्री सूचनामा पहुँच हुनेले बेच्नु पर्ने बेची सके किन्नु पर्नेले किनी सके । अन्तिममा सर्वसाधरणलाई मारमा पार्ने खेलामा राज्यका निकायहरु मौन बस्नु, के देशमा सशासनको खिल्ली उडाउनु होईन ? कि कतै तँ रोए जस्तो गर्नु, म कुटे जस्तो गर्छु भने जस्तै मात्र हो ?

मंगलवार नेप्से बढेता पनि यसको दिगोपनामा शंका थियो । बुधवार पुन ओरालो लागेकोले शंकालाई बल पुगेको छ । आजको कारोबारको नतिजाले थप प्रस्ट पार्ने नै छ ।

बुधवार कारोबारको शुरुवाती समयमा नै नेप्सेले आजको उच्चतम विन्दु १८८३।०९ लाई छोए पश्चात, ओरालो लाग्यो । केही उतार चढावका बिच अन्तिममा नेप्सेले ओरालो यात्रामा नै आज विश्राम लियो । कोराबारको अन्तिम केहि मिनेट बाँकी छँदा  न्यूनतम विन्दु १८६४।७९ सम्म नेप्से आई पुग्यो । यस भन्दा केही माथि नेप्से १८६७।२२ विन्दुमाआजको बजार बन्द भयो ।

बुधवार भोलुम मंगतवारको तुलनामा करिब ७% ले घटेको छ । याे कुल भोलुम ८६ करोड बराबरको रहेको छ । कुल कारोबार समयलाई १० मिनेटमा बिभाजन गर्दा पहिलो आधी घण्टामा आएको भोलुमले बजारलाई माथि उचालेको छ । त्यसपछिका भोलुमले नेप्सेलाई क्रमिकरुपमा तल धकेल्दै लग्यो ।  बुधवार  अन्तिम १० मिनेटमा आएको तुल्नात्मक धेरै भोलुमले बजारलाई माथि थेग्न सहयोग गरेको छ । लगातार तीन दिन देखि अन्तिम १० मिनेटमा आएकोभोलुमले बजारलाई माथि थेगेको छ ।

Figure 1 प्रत्येक १० मिनेटमाभएको कारोबार भोलुम र क्यान्डल बनावट

बुधवार ६३ वटा कम्पनीको अन्तिम सेयर मुल्य बढेको छ भने १ सय ४० वटा कम्पनीको सेयर मूल्य घटेको छ । साथै ९ वटा कम्पनीको सेयर मूल्यमा कुनै फेरबेदल भएन ।

बुधवार सेयर बजारलाई प्राबिधिक सूचकहरूवाट हेर्दा, बोलिंजर ब्यान्ड (Bollinger Band) को तल्लो रेखा तल तिर फर्केने दर घटेको छ भने माथिल्लो रेखा तलतिर फर्कन रोकिएको छ। त्यसतै मध्ये रेखा तलतिर फर्केने मात्रा घटेको छ । नेप्से ब्यान्ड भित्रै बसेको छ र मध्ये रेखातिर अघि बढने सम्भावनालाई जीवित नै राखेको छ ।

पिभोट फिबोनाची (Pivot Fibonacci) अनुरुप बुधवार नेप्सेले दोस्रो आड (Support, S2)मा टेवा लिएको छ । यसले बिहीवार नेप्सेले पुन पहिलो आड (Support, S1) मा अबरोध सामना गर्ने सम्भावना देखाउँछ। जुन १९०० को आसपास रहेको छ ।नेप्से पुन ओरालो लागेमा तेस्रो आड (Support, S3) को वरिपरि रहेने सम्भावना देखाएको छ ।

मंगलवार उकालो लागेको बजार दिगो हुनको लागी बिहीवार उकालो लाग्नु जरूरी छ । नेप्से घटेसँगै भोलुम घट्नु सकारात्मक संकेत हो ।

जोखिम र प्रतिफल सेयर बजारको सबभन्दा सुन्दर र आकर्षक पक्ष हो । सर्वसाधारण लगानीकर्ताहरु निष्क्रिय बस्नु भन्दा गच्छे अनुसार जोखिम ब्यबस्थापन गर्दै कारोबारमा स्मार्टपूर्वक सक्रिय सहभागी हुनु सर्वोपरी हितकारी हुनेछ ।

तथ्यांक स्रोतः www.nepalstock.com.np तथा  www.nepsealpha.com।