साहित्यिक पत्रकारिता विशेषाङ्क सार्वजनिक

काठमाडौं । अमर ज्योति साहित्यिक त्रैमासिकको साहित्यिक पत्रकारिता विशेषाङ्क एक कार्यक्रमकाबिच भब्य विमोचन गरिएको छ । नेपाल विद्युत प्राधिकरणको केन्द्रीय कार्यालयमा आयोजना गरिएको यो कार्यक्रममा पत्रिकाका साथै कथाकार मातृका पोखरेलको कथासङ्ग्रह मलाई पनि निन्द्रा लागेन विमोचन गरिएको हो ।
नेपालमा साहित्यिक पत्रकारिताको अवस्था बारेमा वरिष्ठ साहित्यकार श्रीओम श्रेष्ठ रोदनले चर्चा गर्नु भएको थियो । नेपालमा साहित्यककारको संख्या बढ्दै गएपनि पाठकको संख्या बढ्न नसकेको तर्क प्रस्तुत गर्नुभयो । हामीले प्रकाशन गरेका साहित्यिक पत्रिका हरेकलाई बाँड्दै हिँड्नुपर्ने अवस्था छ, यसलाई बिक्री वितरणको तहमा पुर्याउन सकिएको छैन । ७५ रुपैयाँ खर्च गरेर २५ रुपैयाँको मघुपर्क लिनका लागि कार्यालयसम्म आउने साहित्यकारको प्रसङ्ग उघृत गर्दै उहाँले यो विचार प्रस्तुत गर्नु भएको थियो ।
वरिष्ठ साहित्यकार तथा यस कार्यक्रममा प्रमुख अतिथि नगेन्द्रराज शर्माले साहित्यिक पत्रिका निकाल्ने मान्छे अलि सन्की भएन भने त्यो प्रकाशन सम्भव नभएको बताउनु भयो । उहाँले निजी क्षेत्रभन्दा राज्यका निकायबाट आर्थिक सहयोग लिन गाह्रो भएको गुनासो समेत पोख्नु भयो । सम्पादक भनेको लेखकका विचारलाई उज्यालो बनाउने व्यक्ति हो, तर अहिले त्यो क्रम कमजोर बन्दै गएको छ । सम्पादकमा भाषाको ज्ञान र रचनाको स्तर छुट्याउन सक्ने तागत हुनुपर्छ । तर अहिलेका सम्पादकहरू सम्पादक कम र संकलक बढी भएका उहाँको तर्क थियो ।
यस विशेषाङ्कमा विभिन्न साहित्यिक पत्रपत्रिका सम्बन्धित २६ जना लेखकले आफ्नो विचार प्रस्तुत गर्नुभएको छ ।
विमोचित कृति माथि बोल्दै डा हरि सिलवालले पोखरेलका कथाले सामाजिक मान्यता स्थापित गर्ने विश्वास गर्नुभयो ।
कार्यक्रमको अध्यक्षता विद्युतकर्मी साहित्यिक समाजमा अध्यक्ष विष्णुप्रसाद आचार्यको अध्यक्षतामा भएको थियो ।